मी काहीच बोललो नाही !!!

*त्यांनी* मनपा अधिकाऱ्यांना मारहाण केली,
मी काहीच बोललो नाही,
उलट समर्थनच केले,

*त्यांनी* तहसीलदारांना मारहाण केली,
मी काहीच बोललो नाही,
उलट समर्थनच केले,

*त्यांनी* डॉक्टरांना मारहाण केली,
मी काहीच बोललो नाही,
उलट समर्थनच केले,

*त्यांनी* प्राध्यापकांना मारहाण केली,
मी काहीच बोललो नाही,
उलट समर्थनच केले,

*त्यांनी* कार्यक्रम आयोजकांना मारहाण केली,
मी काहीच बोललो नाही,
उलट समर्थनच केले,

*त्यांनी* बागेतल्या जोडप्यांना मारहाण केली,
मी काहीच बोललो नाही,
उलट समर्थनच केले,

*त्यांनी* स्कायवॉकवरील जोडप्यांना मारहाण केली,
मी काहीच बोललो नाही,
उलट समर्थनच केले,

*त्यांनी* न्यायालयात आरोपींना मारहाण केली,
मी काहीच बोललो नाही,
उलट समर्थनच केले,

*त्यांनी* विद्यार्थ्यांना मारहाण केली,
मी काहीच बोललो नाही,
उलट समर्थनच केले,

*त्यांनी* मुले पळवणाऱ्या महिलांना मारहाण केली,
मी काहीच बोललो नाही,
उलट समर्थनच केले,

*त्यांनी* बस कंडक्टरला मारहाण केली,
मी काहीच बोललो नाही,
उलट समर्थनच केले,

*त्यांनी* रिक्षाचालकाला मारहाण केली,
मी काहीच बोललो नाही,
उलट समर्थनच केले,

*त्यांनी* पाकीटमाराला मारहाण केली,
मी काहीच बोललो नाही,
उलट समर्थनच केले,

*त्यांनी* टीसीला मारहाण केली,
मी काहीच बोललो नाही,
उलट समर्थनच केले,

*त्यांनी* दुकानदाराला मारहाण केली,
मी काहीच बोललो नाही,
उलट समर्थनच केले,

*त्यांनी* फेरीवाल्यांना मारहाण केली,
मी काहीच बोललो नाही,
उलट समर्थनच केले,

*त्यांनी* परप्रांतियांना मारहाण केली,
मी काहीच बोललो नाही,
उलट समर्थनच केले,

*त्यांनी* गोमांस बाळगणाऱ्यांना मारहाण केली,
मी काहीच बोललो नाही,
उलट समर्थनच केले,

*त्यांनी* वर्गणी दिली नाही म्हणून मारहाण केली,
मी काहीच बोललो नाही,
उलट समर्थनच केले,

*त्यांनी* हप्ता दिला नाही म्हणून मारहाण केली,
मी काहीच बोललो नाही,
उलट समर्थनच केले,

*त्यांनी* कित्येक वेळेला माझ्यासमोर कित्येकांना मारहाण केली,
मी काहीच बोललो नाही,
उलट समर्थनच केले,

*त्यांनी* पोलिसांना मारहाण केली,
मला सांगा, यात नवल वाटण्यासारखं काय आहे ?

*राज असरोंडकर*

मोमबत्तीवाला गणपती !!!

हा मोमबत्तीवाला गणपती उल्हासनगरातील पाच नंबर कैम्पात आहे. त्यासमोर मेणबत्ती लावून कामना केली की ती पूर्ण होतेच, मग ते नोकरीधंद्यापासून संततीप्राप्तीपासून काहीही असो. गणपती पावतो. कारण ती नुसती गणपतीची मूर्ती नाही, तर साक्षात गणपतीच आहे...अस्सल !! अगदी उल्हासनगरी असला तरी...

विषय इथेच संपत नाही. उल्हासनगर रेल्वे स्थानकावरील पादचारी पुलावर या गणरायाची महती सांगणारे दोन जाहिरात फलक काढून टाकायला सांगायला मी सीएनसी कडे गेलो, तर तो म्हणाला, *मला स्वत:ला या गणपतीचा अनुभव आला आहे. जो लिखा है, वो सहीं है...*

मी म्हटलं, टिटवाला, सिध्दिविनायक से पॉवरफुल है क्या बोलो. आप बोलते है, तो मैं खुद अपने पैसेसे वैसा बोर्ड लगाता हुं, टिटवाला, सिध्दिविनायकसेभी पॉवरफुल गणपती उल्हासनगरमें..

तो म्हणाला, ऐसा हम नहीं बोल सकते..

मग मी म्हटलं, आज मेरी आपसे जबानी शिकायत है, कल लिखित करूंगा, वोभी आप के खिलाफ कि आप अंधश्रध्दा को बढावा दे रहे हो..

निकालता हुं, म्हणालाय. बघुया काय होतंय, नाहीतर आहे मग, अव्यवस्थेला व्यवस्थित उत्तर !!!
*कायद्याने वागा लोकचळवळ*!!!

माजोरडेपण कोण पोसतंय ?

तर साहेब ....
ठाण्यात कारचालकाच्या अपघातात एक वाहतूक पोलीस मृत्यूच्या दाढेतून परतला..

झालं काय ....
शनिवारी, ३ सप्टेंबर रोजी ठाण्यात तीन हात नाका इथे कर्तव्य बजावत असताना वाहतूक पोलिस नरसिंग महापुरे यांनी एका नो एन्ट्रीत विरूध्द दिशेने भरधाव जाणाऱ्या कारला अडवण्याचा प्रयत्न केला.

त्या निरागस , सालस , कूकल बाळ , नादान आणि भोळ्या असलेल्या "योगेश भामरे " या हिंदू तरुणाकड़े लाईसन्सदेखील नव्हतं. महापुरे गाडी थांबवण्याच्या प्रयत्नात असताना भामरे याने सरळ त्यांच्या अंगावरच गाडी घातली व जवळजवळ अर्धा किमी पर्यंत महापुरेंना फरफटत नेलं. गाडीच्या बोनेटला धरून राहिल्याने महापुरेंचा जीव वाचला. योगेश भामरेला पोलिसांनी अटक केली आहे.

हिंदुत्ववादाला धक्का लागेल, असं काहीच नाही करायचं ठरवलं आहे.  जय महाराष्ट्र .... शान्तिप्रिय समाजाच्या हातूनही चुकून अशा घटना घडू शकतात .... या जागी कार्यकर्ते मुस्लिम किंवा दलित संघटनांचे असते तर आता पर्यन्त सनातन आणि हिंदुत्ववादी लोकांनी सरकारी व्यवस्थेची आणि संघटनेची आबरू काढण्यासाठी जीभेला चाक़ू धार आणली असती .... ठाण्यात मोर्चा काढला असता.  पण हा काही अहमद महंमद अली कुरेशी नाही, हिंदू आहे, म्हणून कोणीच राजकीय नेता ब्र काढत नाही ...आता यांच्या जबड्याला आणि हाताला लकवा मारला आहे.

नरसिंग महापुरे यांना दीर्घायुष्य लाभो !!!

अशी पोस्ट आपण ठाण्यातील घटनेसंदर्भात फिरवली तर ...

त्यासारखा दुसरा मूर्खपणा नाही. क्षणिक धार्मिक भावनेच्या भरात येवून  अशा घटनांचं मूल्यमापन करताच येत नाही. कारण या घटना धार्मिक विद्वेषातून घडलेल्या नाहीत. त्या अपघातीही नाहीत. तर हेतूत: घडवलेल्या आहेत, माजोरड्या प्रवृत्तीतून. ही प्रवृत्ती नियम-कायद्यांचा, संविधानिक व्यवस्थेचा अनादर करणारी आहे आणि जातधर्मभाषाप्रांतापलिकडे सर्व भारतीयांत आहे.

डॉ. बाबासाहेब आंबेडकरांनी इशारा दिला होता की असंविधानिक मार्गांचा अवलंब वाढला तर देशात अराजक माजेल.

आज देशात वेगळी परिस्थिती काय आहे ? अराजकच आहे !!! कोणीही सोमेगोमे उठतात आणि कायदा हातात घेतात. संविधानिक व्यवस्थेला आव्हान देतात. शहाबानो प्रकरण असो की अगदी अलिकडचा दहीहंडीबाबतचा किंवा मशिदींवरील भोंग्यांबाबतचा, मंदिर-मस्जिद प्रवेशाबाबतचा मा. सर्वोच्च न्यायालयाचा निर्णय असो, त्यांचा खुला अनादर केला जातो, कायदा मोडणाऱ्यांना गौरवलं जातं, दोनचार मतांच्या लालसेपायी इथली अख्खी तरूण पीढी भरकटवली जाते. सण, उत्सवांच्या नावाखाली धार्मिक उन्मादाला उत्तेजन देताना, समाजात धार्मिक विद्वेष पसरवून स्वार्थी आणि अनेकदा सवंग लोकप्रियतेचं तोडफोडीचं राजकारण करताना राजकीय पक्षच नियमकायद्यांना फाटा देत असतात. त्यातूनच पोलिसांवर, सरकारी अधिकाऱ्यांवर, डॉक्टरांवर, शिक्षकांवर हल्ला चढवणारी माजोरडी प्रवृत्ती जन्म घेते.

गेल्या सहा महिन्यांत महाराष्ट्रात घडलेल्या पुढील घटना पाहा...

*१९ फेब्रुवारी,२०१६*

लातूरमधील पानगावात शिवजयंतीच्या निमित्ताने भगवा झेंडा फडकवण्यास विरोध केलेल्या पोलिसांना मारहाण केल्याची घटना घडली असून याप्रकरणी १७ जणांना अटक करण्यात आली असून त्यात अल्पवयीन तरुणांचाही समावेश आहे.

*१ जुलै, २०१६*

नाशिकच्या मध्यवर्ती कारागृहात आरोपींकडून पोलिसांना मारहाण केल्याची धक्‍कादायक माहिती समोर येत आहे. खासगी गाडीतून नेण्याची मागणी करत आरोपींनी दोन पोलिसांना जोरदार मारहाण केली असून या मारहाणीत पोलीस गंभीर जखमी झाल्याचे सांगण्यात येत आहे. आरोपींना न्यायालयात हजर करण्यासाठी त्यांना गाडीतून घेऊन निघालेल्या पोलिसांनाच नाशिकमध्ये सात कैद्यांनी मारहाण केली.

*२९ फेब्रुवारी, २०१६*

विरारमध्ये चार महिला पोलिसांना स्टेशनमध्ये घुसून मारहाण केल्याची घटना घडली आहे. अर्नाळा सागरी पोलिस स्टेशनमध्ये ही दोन बहिणींनी पोलिसांना मारहाण केली. प्रज्ञा सिंह आणि गार्गी सिंह अशी या आरोपी महिलांची नावं आहे.

*२२ डिसेंबर, २०१५*

डोंबिवली एमआयडीसीतील बेकायदा इमारत तोडण्यास गेलेल्या एमआयडीसीच्या अभियंत्याला भाजपचे नगरसेवक महेश पाटील व त्यांच्या समर्थकांनी बांधकाम तोडण्यास मज्जाव करून मारहाण केली. कायदा व सुव्यवस्थेचा प्रश्न निर्माण होऊ नये म्हणून मध्यस्थी करणाऱ्या पोलिसांनाही या मारहाणीचा फटका बसला.

*५ ऑगस्ट, २०१६*

वाहतूक  नियंत्रण शाखेच्या पोलीस हवालदार महिलेला मारहाण आणि विनयभंगाचा प्रकार काही दिवसांपूर्वीच घडलेला असतांना ठाण्यातील उपवन भागात दोन मद्यपी तरुणांनी चार वाहतूक पोलिसांना शिवीगाळ करुन मारहाण केल्याची घटना शुक्रवारी रात्रीच्या सुमारास घडली. याप्रकरणी रोहन राजीवडे आणि सागर मांडवकर यांच्या विरोधात सरकारी कामात अडथळा आणणो, पोलीसांना मारहाण करणो यासह विविध कलमांखाली वर्तकनगर पोलीस ठाण्यात गुन्हा दाखल करण्यात आला आहे.

*२५ ऑगस्ट, २०१६*

बारामतीतील तुळजाराम चतुरचंद महाविद्यालयाच्या आवारात विनापरवाना वाढदिवस साजरा करण्याचा प्रयत्न करणार्‍या तरुणांच्या टोळक्याला रोखण्यासाठी गेलेल्या तीन पोलिसांना या टोळक्याने जबरदस्त मारहाण करत गंभीर जखमी केले. हा प्रकार बुधवारी (दि.24) सकाळी सव्वादहा वाजण्याच्या सुमारास घडला. यामध्ये सहाय्यक फौजदार अर्जुन तुकाराम व्यवहारे, कॉन्स्टेबल व्ही. एस. वाघमोडे व राजेश साहेबराव गायकवाड हे पोलिस कर्मचारी गंभीर जखमी झाले.

*६ जून, २०१६*

वाशीतील इनॉर्बिट मॉलमधील पबमध्ये पार्टी करण्यासाठी गेलेल्या तरुणींच्या दोन गटांमध्ये किरकोळ कारणावरून वादावादी होऊन हाणामारीची घटना घडली. या घटनेनंतर मद्यधुंद तरुणींनी वाशी महिला पोलिसांना धक्काबुक्की केली. यात महिला पोलिस किरकोळ जखमी झाल्या आहेत.

*२९ सप्टें, २०१५*

औरंगाबादमध्ये ‘नो पार्किंग’मधील रिक्षा काढण्यास सांगितल्याच्या कारणावरून रिक्षा चालकासह त्याच्या भावाने दोन पोलिसांना दगडाने मारहाण केली. त्यानंतर स्वतःच रिक्षा पेटवून दिली. याप्रकरणी एकाला अटक करण्यात आली असून, अन्य एका आरोपीचा शोध सुरू असल्याचे पोलिसांनी सांगितले.

*२० फेब्रुवारी, २०१६*

पुणे येथील खडक पोलीस ठाण्यात चौकशीच्या पोलिसांनाच धक्काबुक्की करण्याचा प्रकार घडला आहे. त्याचसमवेत सहकारनगर भागात वाहतुकीचे नियम मोडून एकाच दुचाकीवर तीन तरुण जात होते. त्यांना अडवणार्‍या वाहतूक पोलिसालाच शिवीगाळ करून धमकावल्याची घटना घडली आहे. या दोन्ही घटना २० फेब्रुवारी या दिवशी घडल्या आहेत.

*२५ जून, २०१६*

औरंगाबाद - कत्तलीसाठी नेण्यात येणाऱ्या जनावरांचा ट्रक अडवून गोशाळेत नेणाऱ्या पोलिसाला जमावाने बेदम मारहाण केली. इतकेच नव्हे तर ट्रक सहाय्यक पोलीस निरीक्षकांच्या अंगावर घालून त्यांना जीवे मारण्याचा प्रयत्नही करण्यात आल्याने खळबळ उडाली आहे. याप्रकरणी सिल्लोडच्या नगरसेवकासह ४० आरोपींविरोधात सिल्लोड शहर, ग्रामीण, आणि वडोद बजार पोलीस ठाण्यात विविध कलमानुसार गुन्हा दाखल करण्यात आला आहे.

*१० फेब्रुवारी, २०१६*

किरकोळ कारणावरून पोलीस अधिकारी आणि कर्मचार्‍यांना मारहाण केल्याप्रकरणी खासदार विजयसिंह मोहिते-पाटील यांचा पुतण्या सत्यशील याच्यासह त्याच्या 9 साथीदारांना आज अटक करण्यात आली आहे. त्यांच्यावर विविध कलमांखाली गुन्हे दाखल करण्यात आले आहेत.

*शहीद विलास शिंदे प्रकरणात मोर्चा काढणाऱ्या पोलिसांच्या कुटुंबियांकडून या सर्व घटनांची नोंद घेतली गेली आहे काय ?  आपण गुन्हेगारी प्रवृत्तीच्या विरोधात बोलणार आहोत की विशिष्ट जातीधर्माच्या ?*

शेवटी कुठवर आपण स्वत:ची फसवणूक करून घेणार आहोत. *या गुन्हेगारी प्रवृत्ती त्यांचे जातधर्म भेद विसरून हातात हात घालून आपल्या घरात शिरेपर्यंत ?????*

*राज असरोंडकर*
कायद्याने वागा लोकचळवळ

गणराज रंगी नाचतो !!!!

*गणराज रंगी नाचतो !!!*

लता मंगेशकरांच्या आवाजातली कोणतीही भक्तीगीतं ऐकताना मन प्रसन्न होऊन जातं, अगदी आपण नास्तिकबिस्तिक असलो तरीही. इतरांचं माहित नाही, निदान माझातरी हा अनुभव आहे. भक्तीगीतातल्या संगीतात तल्लीन होणं, हे गाण्यावरच्या प्रेमापोटीही होत असेल कदाचित. पण जिथे आनंद आहे, तिथे कारणं कशाला शोधत उहापोह कशाला करीत बसायचा ? मनसोक्त आनंद लुटावा इतकंच. हा आनंद डीजेच्या बेसूर कर्णकर्कश्य आवाजाने आपण का गमावून बसतो कळत नाही. नास्तिक जर भक्तीगीतांतल्या संगीताने डोलत असतील, तर भक्तांची तर ब्रम्हानंदी टाळी लागायला हवी !!! पण तसं होताना दिसत नाही. उत्सवाच्या  नावाखाली भक्तीचा धुडगूस सुरू आहे.

*समाज प्रबोधनासाठी उत्सव*
*काळाच्या ओघात अमान्य झाले,*
*भक्तीच्या बाजारात*
*देवसुध्दा सामान्य झाले,*
*सणाचं पावित्र्य की काय,*
*गेलं वाहून पुरात,*
*खंडणीखोरांच्या आयोजनात*
*गोंगाट लोकमान्य झाले..*

अशी सण-उत्सवांची अवस्था झालीय.   राजकीय मंडळी त्यांचं अपयशाचं पाप झाकण्यासाठी या उत्सवांना उन्मादी स्वरूप देऊ पाहताहेत. हे थांबायला हवं. सण, उत्सव समाजात बंधुतेचं, उत्साहाचं, आनंदाचं प्रसन्न असं वातावरण निर्माण करण्यासाठी आहेत, गढुळ करण्यासाठी नाहीत.

तेव्हा, *डीजेला नकार द्या*. शांताबाई, चिकनी चमेलीला फाटा द्या. गणराज रंगी वाजवा. गजानना श्री गणराया वाजवा. ओंकार स्वरूपा वाजवा. विठ्ठल आवडी, खेळ मांडियला, आनंदाचे डोही वाजवा किंवा अगदी प्रल्हाद शिंदेचं पाऊले चालती वाजवा.
वातावरण आल्हाददायक होऊद्या. *च्यायलामायलातून बाहेर पडलेली सुमधूर मराठी कानावर पडूद्या.*

सोबत प्रबोधनात्मक व्याख्यानं होऊद्या. हस्ताक्षर, निबंध, वक्तृत्व स्पर्धा होऊद्यात. सामान्य ज्ञान स्पर्धा होऊद्यात. नुसता सार्वजनिक नव्हें तर सार्वजनिक कौटुंबिक स्वरूप येऊद्या यंदाच्या गणेशोत्सवाला.

यंदाच्या गणेशोत्सवात इतकं करून पाहाच. हे कधी घडेल, जेव्हा सार्वजनिक गणेशोत्सव लोकांची धर्माच्या नावावर माथी भडकवणाऱ्या राजकीय गुलामगिरीतून बाहेर पडेल तेव्हाच...

आणि हो, *गणपती राजाबिजा काही नसतो*, तो फक्त गणपती असतो. कोणा शेटचा असला तरी आणि गल्लीबोळातला असला तरीही..

*बुध्दिच्या देवतेचा उत्सव साजरा करताना आपला विवेक जागृत असुद्या.*

यंदाचा उत्सव गोंगाट टाळून स्पर्धांचं आयोजन, व्याख्यानंसहित भक्तीसंगीतमय करायचा असेल तर मार्गदर्शनासाठी जरूर संपर्क करा.

*राज असरोंडकर*
कायद्याने वागा लोकचळवळ
9850044201
7666644201
kaydyanewaga@gmail.com

विरोध उन्मादाला !!!

*सण,उत्सवांना आलेलं विकृत स्वरूप मतांसाठीच्या राजकारणातून आलेलं आहे, त्यामुळे ते टिकवून ठेवण्यासाठी राजकारणी धडपडणारच !!!*

त्यांच्यामागे लागून आपण सण, उत्सवातला निखळ आनंद, बंधुभाव, संस्कृती गमावून बसायचं काय, हे जनतेने ठरवायला हवं.

*सजवलेल्या रश्शीवरून दहीहंडी क्रेनला लटकू लागली,*

*ढोलताशांची जागा कर्कश्य डीजेंनी घेतली,*

*पारंपरिक गीतसंगीताची जागा अचकटविचकट गाण्यांनी घेतली,*

*गोविंदा रे गोपाळा च्या जागी शांताबाई आली,*

*धार्मिक भावना, श्रध्दांचा लीलावी बाजार झाला,*

*उत्सवाच्या जागी उन्माद आला,*

*सणाचा जीवघेणा खेळ झाला,*

थर वाढत चालले आणि लहानग्यांचे जीव पणाला लावण्याइतपत राजकारणाचे थर खाली आले,

*तरी कसल्या परंपरेच्या बाता मारताेय आपण ?*

सर्वसामान्यांचं जीणं हराम करणारा, दैनंदिन जनजीवन विस्कळीत करणारा, वृध्द, बालके, रूग्ण यांना होणाऱ्या त्रासाची पर्वा न करणारा उत्सव, कोणत्याही जातीधर्माचा असो, त्यातला उन्माद मोडून काढायची जबाबदारी सर्वप्रथम सरकारची असते. सरकार अपयशी ठरलं, तर न्यायालय नाक खुपसणारच !!!

गोहत्याबंदी किंवा शहाबानो प्रकरणात आपण कोणीच असे म्हटले नव्हते, की न्यायालय नाक खुपसतंय !!!

न्यायालयाचे निर्णय म्हणजे स्वार्थासाठी ठेकेदारांच्या हितार्थ घेतलेले महापालिकांतील स्थायी समितीचे निर्णय वाटतात की काय राजकीय पक्षांना ?

सण,उत्सवांच्या आड इथली संविधानिक व्यवस्था मोडीत काढून धर्मव्यवस्थेला देशापेक्षा वरचढ ठरवायचा डाव, आपण जातपातधर्मभाषाप्रांत भेद विसरून हाणून पाडायलाच हवा. *अन्यथा बंद करा १५ ऑगस्ट नि २६ जानेवारीला तिरंग्यांचे प्रोफाईल फोटो लावणं !!!*

मा. सर्वोच्च न्यायालयाच्या आदेशांची जर देशात खुली अवमानना व्हायला लागली, तर देशात अराजक यायला वेळ लागणार नाही. *ही अराजकता भारताचा पाकिस्तान करायला वेळ लावणार नाही !!!*

*विरोध उत्सवाला आणि त्यातल्या उत्साहाला नाही, उन्मादाला आहे, हे लक्षात घ्या.*

*राज असरोंडकर*
कायद्याने वागा लोकचळवळ

दुर्घटना नव्हेत, इशारे !!!!

*दुर्घटना नव्हेत, इशारे !!!*

धार्मिक उन्मादाचे, अव्यस्थेचे, बेफिकीरीचे, उदासीनतेचे अजून किती बळी हवेत ?
〰〰〰〰〰〰〰〰

१९९३ ला महानगर दैनिकात पत्रकारिता करीत असताना, सिंधी कुटुंबात गणपती ठेवलाय, म्हणून मी बातमी करायला गेल्याचं मला आठवतंय. ज्या कुटुंबाने गणपती ठेवला होता, त्याच्या प्रमुखाने मला सांगितलं की मुलाने खूप हट्ट केला, म्हणून बसवला गणपती !!!

पुढे मुलांचे हे हट्ट घराघरांतून पुरवले जाऊ लागले आणि ते गल्लीबोळात कधी झिरपले कळलंच नाही. उल्हासनगरात आता रोज गणपती येतात आणि रोज विसर्जित होतात. हौसेमौजेला गणपतीची प्रतिष्ठापना करणाऱ्यांनी इथली प्रशासकीय आणि सुरक्षा व्यवस्था जाम करून ठेवली आहे.

विशेषत: सिंधी समाजाचा उल्लेख यासाठी केला की सिंधी युवकांसाठी गणेशोत्सव म्हणजे एकप्रकारचं आर्थिक शक्तीप्रदर्शन असतं. याचा अर्थ इतर समाज फार शिस्तीत असतात, असं समजण्याचं कारण नाही.

मोठमोठ्या मूर्त्या, भडक रोषणाई, फटाक्यांची अमाप उधळण आणि कानठळ्या बसवणारे एकमेकांशी शक्तीप्रदर्शन करणारे डीजे यापलिकडे या गणेशोत्सवांमध्ये भक्तीभावाचा लवलेशही नसतो. आर्थिक मस्तीच्या जोरावर गणेश आगमनाची आणि विसर्जनाची मिरवणूक चौकाचौकात थांबवून वाहतूक कोंडी करण्यात या मंडळांना वीरता वाटते. या युवकांचे युथ आयकॉनही धांगडधिंग्यावर स्वार होऊन गुन्हेगारी राजकारण करणारे असल्याने मंडळांचा उन्माद आणि पोलिसांची हतबलता असं चित्र दरवर्षी गणेशोत्सव काळात पाहायला मिळतं.

कसलंही सामाजिक काय, वैयक्तिकही भान नसतं. अरूंद गल्लीबोळ, जागोजागचे खड्डे, चिखल, ओबडढोबड स्पीडब्रेकर्स, डोक्यावर कुठून कसंही गेलेलं आडवंतिडवं केबल आणि विद्युत तारांचं जाळं, बैनर्स, होर्डिंग्ज, पताका या सगळ्या बकाल अवस्थेतून वाट काढत या गचाळ शहरात यायला गणपतीला तरी कसं आवडेल, याचा विचार या उन्मादात कधी केला जात असेल का ?

दुर्घटना यापूर्वी घडल्या नाहीत, असं नाही, पण प्रत्येक वेळी लोकप्रतिनिधींनी मगरीचे अश्रु वाहायचे आणि स्वत:ची पापं झाकायची, लोकांनी त्याला वारंवार बळी पडायचं आणि वारंवार बळी जायचं व निवडणुकीत अव्यवस्थेला जबाबदार असणाऱ्यांनाच पुन्हा पुन्हा निवडून द्यायचं, असं चाललेलं आहे.

दुर्घटना घडतात, तर त्यात भविष्यकाळात सुधारण्यासाठी इशारेही असतात. पण मानवी जीवाची किंमतच आता कस्पटासमान झाली आहे. स्वार्थ, पैसा, चंगळवाद, धार्मिक उन्माद, हुल्लडबाजी यांना उधाण आलं आहे. त्यालाच लोक आता संस्कृती म्हणू लागले आहेत. या  तथाकथित संस्कृतीनेच सुजल गडापकर नावाच्या शाळकरी मुलाला दहीहंडी थरावर नेलं व पडून गंभीर जखमी केलं. जेएमडी ग्रुपच्या किशोरावस्थेतील दोन मुलांना वीजेचा धक्का लागून जीव गमावावा लागला. अजून किती बळी हवेत इथल्या अव्यवस्थेला, लोकप्रतिनिधींच्या बेफिकीरीला आणि लोकांच्या उदासीनतेला.

*जागे व्हा लोकहो, आपल्या घरातील प्रिय व्यक्ती गमावण्याच्या आधीच जागे व्हा !!!*

*राज असरोंडकर*
कायद्याने वागा लोकचळवळ

ट्रेनिंग स्कूल फॉर एन्ट्रन्स टु पॉलिटिक्स !!!

*ट्रेनिंग स्कूल फॉर एन्ट्रन्स टू पॉलिटीक्स*

उत्कृष्ट संसदपटू होण्यासाठी आवश्यक असणाऱ्या गुणांची या क्षेत्रात कार्य करणाऱ्या नेतृत्वात निर्मिती होण्याच्या दृष्टीने डॉ. बाबासाहेब आंबेडकरांनी मुंबईत ट्रेनिंग स्कूल फॉर एन्ट्रन्स टू पॉलिटीक्स सुरु केले होते. बाबासाहेब स्वतः या संस्थेचे संचालक होते व शां. श. रेगे रजिस्ट्रार होते. देशातील लोकशाहीविषयक विचाराला आणि कार्याला परिणामकारक चालना मिळावी, त्याचप्रमाणे आपल्या नियोजित रिपब्लिकन पक्षामध्ये तरुणांची भारती व्हावी, ह्या हेतूने राजकारणात प्रवेश घेऊ इच्छिणाऱ्या लोकांसाठी हे प्रशिक्षण केंद्र सुरु करण्यात आले होते. जे विधिमंडळात कामकाज करण्याची महत्वाकांक्षा बाळगतात त्यांच्या शिक्षणाची व्यवस्था या प्रशिक्षण केंद्रात बाबासाहेबांना करायची होती. शिक्षक होऊ इच्छिणारा मनुष्य आपल्या विषयात प्रवीण पाहिजे. त्याला उत्तम रीतीने व्याख्यान देता आलं पाहिजे, त्याचे व्यक्तिमत्व आकर्षक पाहिजे, विद्यालयाचा लौकिक शिक्षकाच्या कर्तुत्वावर आणि वक्तृत्वाच्या सामर्थ्यावर बराच अवलंबून असतो, असे बाबासाहेबांचे मत होते. १ जुलै ५६ ते मार्च ५७ पर्यंतच हे विद्यालय चालले. बाबासाहेबांच्या मृत्यूनंतर पोरके होऊन ते बंद पडले. संसदीय संस्थेमध्ये सभागृहाला आपल्या सौम्य अथवा तीक्ष्म तर्कशुद्ध आणि माहितीपूर्ण भाषणाने जो सभासद भरून टाकू शकतो, तोच सभासद यशस्वी होऊ शकतो, हे बाबासाहेबांचे उद्गार....ट्रेनिंग स्कूल फॉर एन्ट्रन्स टू पॉलिटीक्स मध्ये राजकारण, अर्थशास्त्र, अंदाजपत्रक, कामगार संघटना, संसदीय कामकाजविषयक नियम आणि परंपरा इत्यादी आवश्यक विषयांबरोबर बाबासाहेबांनी वक्तृत्व साधनेला महत्व दिले होते. डिसेंबर ५६ मध्ये बाबासाहेब स्वतः या संस्थेत वक्तृत्वावर व्याख्यान देणार होते. पण त्यांच्या आकस्मिक परीनिर्वाणाने एका प्रभावी वक्त्याच्या मार्गदर्शनाला ती संस्था व तिथले उत्सुक विद्यार्थी मुकले...

*डॉ. बाबासाहेब आंबेडकर लेखन व भाषणे या पुस्तकातून.*

प्रचार व प्रसार  : राज असरोंडकर
कायद्याने वागा लोकचळवळ